| Ahmed's profileO2APhotosBlogLists |  Tools  Help |
|
It is time to say good byeعفواً ولكنها كانت تجربة عظيمة
هذه التدوينة هى اخر تدوينة لى فى هذه المدونة (بأذن الله) انتقلت رسميا إلى بلوجر و لقد كانت تجربة عظيمة ومفيدة March 15 Moving to Blogspotأنا بعزِّل إلى Blogspot
اليومين دول أنا بكتب هنا قليل ؛أقدم إعتذارى؛ لأنى بلِم عزالى علشان أكمل المسيرة فى بلوج سبوت إلى اللقاء هناك إن شاء الله وحاليا أنا بكتب هنا وهناك March 09 Israeil thinks egyptians are foolsربنا ما يحرمنى من العبط
النهاردة وانا ببص على صفح العربية لقيت الخبر ده صحيفة: مخرج وثائقي إعدام الأسرى المصريين يقر بارتكابه خطأ الصراحة لما قريت الخبر حسيت بأن عرق العبط نقح عليا وأن العصافير اللى انا داققهم رجعوا تانى بعد ما كانوا مهاجرين كندا(بيشتوا فى الصيف لأن الحياة بمبى هناك). يعنى مش كفاية وقاحة الإسرائيليين فى الافتخار بهولوكوست جنودنا المصريين..!!! لاء كمان بيعاملونا على أننا عبط وبريالة بس أقول ايه ..!!!مفيش أنسان بيتهزأ...فيه أنسان بيسب الناس تهزأه وأنسان بييوقف الناس عند حدودها ومايخليهاش تدوس له على طرف(والاخير ده هو المحتل الإسرائيلى) بس خلاص .... خلص منى الكلام وكل اللى يجرى لنا فى مصر نستحقه علشان سايبين الناس دى تهزأنا بعد ماقتلوا أسرانا العزل Israeili Ambassador and theEgyptian Holokostهذا هو أقل ما نستحقه وهذه هى المقدمة والبقية تأتى
كنت نويت أنى اخد أجازة شوية بس من الواضح أن كالعادة الدنيا سودة واللى جاى أسود من قرن الخروب؛كنت بسيرف النت؛وألأقى الخبر ده على موقع جريدة الوفد السفير الإسرائيلي: لن نحقق في قتل الأسري المصريين والصراحة أتفقعت مرارتى تانى (الحمد لله فى مصر علشان الواحد يعيش لازم يكون متعدد المراريات؛"جمع مرارة") ايه الوقاحة دى وأزاى مصر تسيب بنى آدم زى كدة يقول الكلام دة أمال فين الراجل الطيب أولمرت(زى ما سيادة الرئيس مبارك قال وصفه ) مطلعش ليه قال معلش يامصريين متزعلوش .أنا فاكر أن علشان جلعاد شاليط الجيش الإسرائيلى كان بيدك فلسطين المحتلة وكان المسؤلين الإسرائيليين بيقولوا :"جندى من جنودنا بوزرائكم" أمال إحنا ليه تركنا حقوق أبطال الجيش الذين سيقوا إلى معركة بدون إعداد أو تنظيم أو تدريب وأُسروا وذبحوا فى الاسر ومنهم من حفر قبره بيديه ثم قتل فيه ومنهم من دهسته الدبابات و... و... و... أقول ايه ولا أيه ولا أيه . يعنى حراس أمن مصر إحنا القينا بيهم فى الحرب بدون أى شىء وتركناهم ليُذبحوا أو تدهسهم الدبابات وكمان تركنا حقوقهم و عندما تفاخر النازيين الإسرائيلين بهولوكوست المصريين لم نقدر ايضا على أن نصنع شىء لهذا العدو وكمان السفير الإسرائيلى فى مصر(مصر أقوى دولة فى العالم العربى) يقول كدة بمنتهى الجرأة.
أين رد حكومة جمهورية مصر العربية الموقرة ....؟؟؟ لاشىء... !!! أين رد الحزب الحاكم ...؟؟؟...لاشىء!!! أين رد رئيس الجمهورية بطل الطلعة الجوية التى ألحقت الهزيمة بهذا العدو...؟؟؟ لاشىء......!!!!!!! أين رد المجتمع المصرى...؟؟؟؟ لاشىء...!!! ردى أنا كبنى آدم( سابقاً )هو .... لاشىء إذا نحن كمخلوقات (لاأقدر أن أقول بنى آدمين مصريين لأننا تركنا كل شىء له علاقة بالآدمية وتصرفنا ومازالنا نتصرف على اساس أن البلد دى مش بتاعتنا دى بتاعنهم هم) لانستحق أن يدافع عنا هذا الجيش الذى هو من خير أجناد الارض. ياسيادة الرئيس أنت لم تقدر حتى على واحد من شعبك تسبب فى موت 1500 مصرى لأن فى حد فى البلد بيحميه...!!!فكيف ستقدرعلى هذه الدولة وجنودها ووزيرها ولا أقصد الحرب و لكنى أقصد جميع الإجرأت التى أتخذتها إسرائيل تجاه من قاموا بالهولوكوست نتخذها نحن أيضاً تجاه إسرائيل مع العلم بأن هذه الإجرءات طالت الرئيس النمساوى كورت فالدهايم (أثناء ترشحه للرياسة)....؟؟؟!!! ياسيادة الرئيس لقد كنت بطل الطلعة الجوية التى فتحت باب الحرية ....!!!ولقد حان الوقت لتكون بطل الديموقراطية أيضاً وتتخذ قرار التنحى وتكون بهذا بطلاً لمصر فى الحرب و السلم أيضاً
لقد حان وقت تنحى سيادتكم عن مسؤلية رئاسة جمهورية مصر العربية March 01 Update of slaughtering egyptian soldiersهه وبعدين تحديث:أين حقوق هولاء الشهداء
النهاردة الخميس 1/3/2007 جورنال الاهرام نشر أن كان فى جلسة غاضبة فى مجلس الشعب إمبارح (يامسهل) وكان فى ردود افعال غاضبة و....و..... وايه كمان بقى الكتور مصطفى الفقى قال أنها ليست المرة الأولى التى تسرب إسرائيل مثل هذه المشاهد (واخد بالك أنت مش المرة الاولى.... يعنى الحكومة كلها عارفة..!!! الحكومةايه يارجالة..... عارفة!!!! بتقولوا ايه يارجالة.... الحكومةعارفة!!!!) طب نيجى للسؤال المهم الحكومة عرفت ومجلس الشعب غضب ... طب وبعدين هل مجلس الشعب هيتخذ خطوت إيجابية رادعة ولا الحكاية كلها هتكون كالعادة نطلع نطلع وننزل على مفيش ولا هنعمل لجنة على أعلى مستوى تعمل إجتماعات و.... و..... و.... وفى الاخر كأنك يأبوزيد ماغزيت يارب إرحم جنودنا اللى لما بيضحوا بأرواحهم محدش بيسأل فيهم و لا بيدوّر على حقوقهم Slaughtering of the efgyptian soldiers...what are we going to doأين حقوق هولاء الشهداء
أمبارح (الاربعاء 28/2/2007 )فى جورنال الاهرام فى الصفحة الاولى لقيت الخبر ده مكتوب بن اليعزر قاد مجزرة لقتل ٢٥٠ جندياً مصرياً فى سيناء٦٧ . ذكر بعد كدة ان كان فى فيلم على القناة الاولى فى التليفيزيون الاسائيلى طلع فيه بن اليعازر واتكلم بهدوء شديد(ياوقاحته)عن إزاى كان الجنود الإسائيلين بعد وقف إطلاق النار فى 1967 كانوا يلاحقون الجنود المصريين العزل ويقتلونهم بدم بارد برغم عدم قدرة الجنود المصريين على القتال وأنه قاد العلميات دى. الفيلم تضمن مقاطع وثائقية تظهر قتل هولاء الجنود يعنى من الأول طالعين وعارفين هيعملوا ايه بالضبط وكمان جايبين التليفزيون يصور !!!!!!!!!!!!!!!!!!!!!!!!!
عندى سؤال مهم : إزاى إسرائيل تلاحق المشتركين فى محارق الهولوكوست جميعاًمهما مر الزمن عليهم ولاحقت المانيا ايضاً من أجل دفع تعويضات لإسرائيل . وأحنا نترك السفاحين الذين ذبحوا اسرانا العزّل فى صحراء سيناء. أين المدافعون عن الجيش المصرى الذين أرادوا معاقبة طلعت السادات أشد العقاب على ماأقترف فى حق الجيش المصرى(كما قالوا)...؟؟؟ أين الإجرات الرادعة السريعة التى أدخلت طلعت السادات السجن بسرعة البرق....؟؟؟ كيف نطلب من الجنود حراسة أمن مصر والتضحية بأرواحهم فى سبيلها مع علمهم بأنهم إذا قُتلوا غيلة بعد أسرهم ماحدش هيسأل عنهم أين هو مجلس الشعب الذى شهد جلسات عاصفة من أجل مواقف أقل من هذا الموقف الوف المرات..؟؟؟ أين مجلس الامن القومى الذى تحدث وكيله عن سفاح المعادى (هم مش برضه الجنود ليهم حق من الاهتمام ده) سؤال أخر للحكومة الموقرة :ماذا ستفعل (حقيقةً) بعد نشر هذا الخبر فى الحريدة الرسمية..؟؟؟
لاتعليق ....... لقد نفذ منى الكلام حزناً على حقوق ابطال مصر الذين تُركوا ليقتلوا ولاسمعنا عن هيئة سعت لمقاضاة هولاء السفاحين (أرجو ألا تكون الأستجابة هى عمل هيئة لمقاضاة هولاء السفاحين وبعد كدة الموضوع ينام كالعادة ...!!!. أخبار سفاح بنى مزار أيه ..؟؟ماحدش يعرف طريقة للقبض عليه..؟؟؟).
أرجو عدم معقابتى على هذا الكلام بتهمة إهانة دولة بينا وبينها معاهدة سلام...!!! ماعنديش مانع من المعاقبة على تهمة (ملفقة) تانية بس نقوا والنبى كدة واحدة على كاروهات علشان تبقى لايقة عليّا (بالمناسبةانا مقاسى فى التهم Large ) February 28 Torture in Egypt and Maadi slayerوتستمر المهزلة
اللية دى فتحت الموقع بتاع جريدة المصرى اليوم (لاجل حظى الحلو مانا كنت هنام بدرى. ايه بس اللى خلانى افتح النت..؟؟!! اللى فيه داء مايبطلوش؛ ما علينا)المهم لقيت الخبر ده:«المصرى اليوم» تكشف محاولة فاشلة لغلق ملف «مجرم المعادي» قلت لما اقرا واشوف ايه الحكاية خصوصاً ان كان فيه كلام سابق عن السفاح بتاع المعادى و كلام اسبق عن السفاح برضه و كالعادة لقيت أن احد الأخوة الضباط ااشتبه خطأ فى الطالب الغلبان وعذبه فى القسم (يا نهار أسود ايه اللى ان كتبته ده؛ هو أن حد يتعذب علشان البيه الضابط اشتبه فيه خطأ بقى كالعادة؛ يانهار اسود ومنيل) وكانوا هايقلعوه البنطلون علشان يعترف (علشان يبقى عماد الكبير نمرة 2) والراجل أعترف من خوفه من الاعتداء الجنسى عليه و فى الأخر السيد المحترم رئيس القطاع هو اللى أفرج عنه (مع العلم أن سيادة رئيس القطاع رفض تحرير محضر بالواقعة) و كمان الضابط بعد قرار رئيس القطاع كان عايز يلبسه مصيبة تانية أذا ماأعترفش زوراً بأنه هو سفاح المعادى. السيد الضحية المرة دى تقدم بشكوى للسيد وزير الداخلية برقم :4/807
عندى سؤال مهم جداً هو: السيد الضابط مش مالى عينه حد ولا أيه..؟؟؟؟؟ إزاى رئيس القطاع يأمره بالإفراج عن شخص برىء ومع ذلك يصر الضابط المحترم على تلفيق القضية لهذا البرىء...؟؟؟
أعتقد أن هذه الواقعة يقع عبء كبير منها على المجتمع؛"" يعنى إحنا""؛ لأننا سكتنا على واقعة عماد الكبير واللى حصل فيها وبقية جرائم التعذيب وبكده أصبح اى حد عرضة لأى شىء فى هذا البلد:يعنى ياإما أن يقبل المواطن بهتك عرضه أو أن يقبل المواطن انه يعترف بجريمة لم يرتكبها ويضيع مستقبله.
ألهذا الحد وصلنا...؟؟؟
هل أصبحت أعراض المصريين سبيل يَلِغ فيها كل من هب ودب أنا أعلم أن جلسة من جلسات مجلس الشعب تحدثوا فيها عن ماقاله فاروق حسنى فى الحجاب، فهل سيعتبر مجلس الشعب وقائع التعذيب مسألة هامة أم ان المجلس هو الأخر يعتبرها شىء عادى(حاجة ببلاش كدة)؟؟؟؟ هل سيعتبرالسيد وكيل لجنة الدفاع والامن القومى هذه المسألة مسألة هامة ويضعها فى إهتماماته أم أن أمن المواطن المصرى أصبح بلا قيمة للجنة الدفاع والامن القومى المصرى...؟؟؟ طب هل ننتظر أن تصل المسألة للسيد الرئيس وبعد ذلك يفحصها ويتابعها وبعدها يصدر تويجهاته لكى تتحرك الاجهزة المعنية..؟؟؟!!!!!
أم ان هذه الواقعه حلقة أخرى من مسلسل نهاية الحضارة المصرية على يد الحكومة السنية...؟؟؟ February 23 A new prospect for our futureمصر والزبالة والأطباء والمستقبل
مستوحياً من المدونة Day light قررت ان اكتب هذه التدوينة و ذلك بعد زيارتى احد اصدقائى الاطباء؛ ليه بقى لانه كان نوبتجى فى احدى الرعايات فى الصرح الطبى العظيم وكان عنده بعض من الاطباء الشبان الى طلع مرتبهم اد ايه ياشباب 120جنيه...!!!جنيه ينطح جنيه زى ما بيقولوا وبعد شوية يبقى مرتب الطبيب الشاب ده اديه ياشباب 180 جنيه...!!!جنيه ينطح جنيه برضه.انا فاكر من كام سنة كدة كان فى كلام عن الكناسين فى الشوارع(واقدم لهم كل إحترامى) إن كان فى وظائف خالية للكناسين بمرتب 140 جنية؛ آه و الله انا فاكر المرتب 140 جنيه فعلاً. وبعدين انا فاكر من كام شهر لما كانوا بيكتبوا مصاريف التحصيل بتاعة الغاز (قبل ما يبتدوا يوزعوا الإعلانات مع الفاتورة) كانوا بياخدوا من كل شقة 1.5جنيه او 1.25 جنيه ؛مش فاكر باضبط يعنى التحصيل من 200 شقة بس كان يطلّع بالميت كدة 450 جنيه يومياً يعنى اكتر من مرتب الطبيب الشاب فى شهر( مع العلم بان جزء كبير من مرتب الطبيب بيتصرف اكل وعلى المرضى زى ماالاخوة قالوا) ونيجى بعد كدة نقول اخطاء الاطباء..!!!!!!انا فاكر برضه السيد الوزير المحترم الحالى اللى كان سابقاً فى وزارة التعليم العالى؛ قال ايه على الاعداد الكبيرة لقبول طلبة الطب"انا ماأقدرش اقف امام احلام الشباب" .طب انا عندى سؤال واجعنى قوى:"سيادة الوزير عرف منين ان احلام الشاب انه يطلع يجهاد فى سبيل الله والوطن فى الحقل الطبى ويعيش مرتبه اقل من الكناس مع مطالبته باحدث ما فى العلم من تطور و متابعة التقدم العلمى(مفيش مجلة علمية ببلاش كله بفلوس؛ وفلوس غالية كمان). انا عندى اقتراح كويس جداً للسادة الاطباء :الاطباء يتنازلوا عن مرتبهم بالكامل للحكومة والحكومة تتصرف وتديهم اكل وشرب وايجار وكهربا ودروس خصوصية للعيال (إذا فضل فى الاطباء صحة للخلف) وتديهم المجلات العلمية اللى بمئات الجنيهات يقروها وبعد كدة لو حد عمل غلطة يقطعوه حتت حتت(الفكرة دى مش كلها فكرتى تقريباً قريت شبهها فى جورنال او مجلة انا مش فاكر خالص)
ياخوننا حرام علينا اللى بنعمله فى الاطباء ده منتهى الظلم. ده الانسان اللى مابيعرفش الالِف من كوز الذرة عارف كويس إن لو فى حاجة كترت و رطرطت سعرها بينزل الارض وده اللى عملته الحكومة بالضبط بتدخل الوف الطلبة كلية الطب وبعد الشقا والهم يطلع ما اتعلمش كويس(احنا دلوقتى ترتيبنا كام على مستوى الجامعات اللى فى العالم ايه ؟؟؟؟ مع العلم إن زمان كان لمصر ترتيب متقدم جدا جدا) وشحات ومالوش فرصة يتعلم او يشتغل. اليس هذا هو الظلم بعينه مع العلم بأن كل من تولوا وزارة التعليم والتعليم العلى من خيرة عقول مصر وأغلبيتهم كانوا من نخبة التنظيم الطليعى ...!!!!! يعنى نخبة النخبة؛ يعنى عارفين كويس هم بيعملوا ايه بالضبط.طب ليه بيعملوا كدة..؟؟؟ اعتقد ان السياسة التعليمية للإدارة الحالية لحكم مصر هى تخريب التعليم؛بمعنى ان الطلبة لما يتلهوا فى المذاكرة والإمتحانات بدءاً من اولى إبتدائى إلى نهاية التعليم الجامعى الناس مش هاتدور ورا إصلاح البلد.إزاى؟؟؟ أقولكوا إزاى : 1-نقول إن كل سنة فيها حوالى 300،000 طالب (دول اللى بيتخرجوا من الثانوية) 2- وعندنا12 سنة تعليم + 4 تعليم جامعى(مع الإعتذار لطلبة الطب و الهندسة) 3- ونقول إن كل طالب له بابا وماما يعنى اتنين افراد
**نحسب بقى : 300,000*12=3.6 مليون طالب 3.6 مليون * باباو ماما=7.2 مليون بابا و ماما مش فايقين لحاجة غير العيال 7.2+3.6= 10.8 مليون مصرى مشغولين خليها 10 مليون علشان الحبايب
دول بقى المشغولين دلوقتى غير اللى كانوا مشغولين من 5 سنين غير اللى كانو مشغولين من 10 سنين ده غير العدد العظيم اللى عنده امية شديدة وتحياتى لبتوع محو الامية اللى بقالهم 20 سنة واعداد الأميين بتزيد سنة ورا سنة يعنى اغلبية الناس اللى تقدر تصلح البلد او ممكن تفكر فيه مشغولة واللى اهاليهم مش مشغولة بمذاكرة مشغولين بيدوروا على وظيفة للخريج اللى اصبح دلوقتى عاطل والبُنية اللى اتخرجت و مش لاقية شغل ولا جواز(ماهم العرسان عندهم بطالة هم كمان) يعنى الإدارة الحالية أدت مهمتها بنجاح تام !!!!كل الناس مشغولين و مطحونين ومحدش قادر يفكر فى إصلاح أو عدل أو ديموقراطية كله تمام وكله تحت السيطرة ياباشا
الكلام اللى مكتوب عن الاطباء ينطبق على بقية خريجى الكليات الاخرى والكلام ينطبق على جميع الجامعات المصرية إحنا كلنا سعينا بسلبيتنا لهذا الوضع القمىء الذى ننحدر فيه بدون أن نصل إلى قاع وقد آن أوان الحصاد February 21 Nasr city robbersالتثبيت والسفاح والامن العام
الليلة دى اول مرة اتفرج على حتة من برنامج الاخ تامر فى بيتهم (البيت بيتك سابقاً) بقدر من الاهتمام ؛الاخ تامر اتكلم لتانى يوم على التوالى على اللى بيجرى فى مكرم عبيد(امبارح الاخ تامر ذكر ان المحافظ ساكن فى المنطقة دى).اللى بيجرى فى مكرم عبيد زى ماقالو فى التليفزيون ان فى ناس باليل بتيجى وتتعاطى المخدرات فى منطقة مكرم عبيد والأماكن المحيطة. المهم انه الليلة دى احد السكانين(الاستذ خالد على) فى منطة مكرم عبيد اتكلم وقال: ان اولاده من كام يوم باليل الساعة 8 مساء تقربياً وهم راجعين من درس فى إحدى مواد الثانوية العامة طلع عليهم 3 اشخاص وبالمطاوى هددوهم وسرقهوم عنوة(رفَّعوهم بالعامية يعنى) وذكر ايضاً ان فى حد من جيرانه ابنه اتعرض للموقف ده وحاول يقاوم فالاخوة الحرامية ضربوه بالمطواة وسابوه غرقان فى دمه.المهم الاخ خالد كمان قال انه راح القسم وكالعادة طنشوه والأخ تامر قام قاطعه وسكّته ...!!!ماعلينا.المهم ان الاستاذ خالد قال برضه ان الناس بطلت تنزل بناتها وعيالها بعد الساعة 6 مساء طب لما نيجى نفكر : 1- سفاح بنى مزار لسه ماحدش قبض عليه لحد الآن والمتهم اللى قدمته السلطات بأدلة دامغة ؛المحكمة برأءته علشان الادلة طلعت فشنك (وده كلام قضاء مصرالشامخ العادل ، مش انا) يعنى علشان اهل بنى مزار غلابة ومالهومش واسطة عند السيد المسؤل علشان يتعطف ويدور على مرتكب المذبحة؟؟؟ 2-طب بلاش نتكلم عن الغلابة نتكلم عن الناس الهاى؛ ماهو سفاح المعادى لسه ماحدش قبض عليه ولا عرف له طريق جرة ولا ايه حكايته. 3-طب بلاش الناس الهاى نتكلم عن الناس اللى فى مراكز السلطة ؛ماهو اصل مش ممكن يعنى المحافظ بتاع المحافظة ساكن فى الحتة دى(زى ما الاخ تامر قال يوم الاثنين 19/2/2007 ) امل إزاى الحتة دى مافيهاش امن بالطريقة دى؟؟؟. ماهو اصل مش ممكن يعنى ياإخوننا ربنا عرفوه بالعقل مش ممكن كدة يعنى
طب دلوقتى الاخوة بتوع الامن دول بيقبضوا مرتباتهم على اى اساس:علشان المواطن، اللى اتعرض للسرقة المسلحة،لما يخش القسم علشان يبلغ؛ يطنشوه ويسبوه زى ماخرج زى ما دخل (يحمد ربنا انه ما اتعرضش للتعذيب فى النص زى الاخ عماد الكبير اتعذب فى القسم اللى كان محجوز فيه وبقية الضحايا اللى اتعذبوا فى الاماكن الثانية.....شكراً للأخوة الضباط فى قسم مدينة نصر على انهم طنشوه بس وماعذبوهش علشان جه يزعج السطات بمشكلة هايفة من عينة السرقة المسلحة أو القتل) طب ياخوننا ده سيادة الوزير المحافظ ساكن فى الحتة دى....!!!!! هم إزاى سايبين الدنيا كدة؟؟؟!!! فين ايام زمان لما كان الواحد لمايسكن جنبه مسؤل، قوم تلاقى الطريق اللى بيمشى فيه المسؤل بس هو اللى اترصف والمكان اللى هو ساكن فيه بس هو اللى امان... فييييييين ايام زمان (ليت الزمان يعود يوماً). يتبقى السؤال الازلى هوالبلد امتى ينصلح حالها ،طب بلاش هل هينصلح حالها و لا المركب هتفضل تغرق(علشان نحصّل العبارة احنا كمان) واحدة واحدة و بطريقة وحشة كمان ولا اللبلد هترسى على فين بالضبط؟؟؟
المهم برضه انه قرب اخر البرنامج اتصل احد المسؤلين على الهواء وقال ان فى حملات وتمشيط و..... و.... و.... بس المسؤل ماعلقش على الاخ خالد وقلة الاهتمام الذى عُومل به من قِبَل الضباط فى القسم .
ماتيجى نحسبها: شباب+بطالة+مستقبل اسود+فقر مدقع+اثارة جنسية= احداث العيد+احداث مدينة نصر+احداث المعادى+......... وهذه المشاكل هى مجرد البداية ؛بداية طوفان هادر لا يترك اخضر ولا يابس.... February 20 The Egyptian boat mass murder 3العبارة كلاكيت 3 مرة
كالعادة ببص على النت لقيت الخبر المفرح ده على موقع جريدة المصرى اليوم «لجنة أبوالعينين» تعطل عقد لجنة تقصي الحقائق حول حادث العبارة الصراحة حاجة تفقع المرارة؛ يعنى لو كان للاخ ابو العينين" بعد الشر عنه وعن القارئين" كان له حد على العبارة توفى كان يسيب اللجنة بتاعته تأخر التقرير بتعاها كده طب الاخ اللى متسبب فى تأخير التقرير ده لو له حد قريبه أو حد يعرفه أو حتى بنى آدم من ابعد اصحاب اصحاب اصحبه مش كان خلى التقرير يمشى بسرعة البرق كنوع من المجاملة لهذا الشخص ولا علشان ضحايا العبارة من الناس الغلابة اللى مالهومش واسطة
ملحوظة هامة اسثغاث ضحايا العبارة بفخامة السيد رئيس الجمهورية محمد حسنى مبارك ومع ذلك تسبب احدهم فى هذه اللجنة التى يرأسها السيد أبو العينين(عضو فى الحزب الوطنى الذى يرأسه السيد الرئيس) فى تأخير التقرير ..............لاتعليق الرجاء من السيد ابو العينين يبص على الجزء ده من برنامج الحقيقة يمكن يصدق ان الناس اسثغاثوا بالريس فعلاً والتقرير يتحرك بسرعة
February 16 Egyptian Warriors are the stongest among them allأول مرة أفرح من زمن
النهاردة لقيت المدونة دى frozen love مكتوبة فيها تدوينة عن الاخ تامر حسنى وحفلة عيد الحب ولما قريتها قلت فى عقلى الله يخرب بيت اللى كانوا بيدوا الفراخ حبوب منع الحمل(كان فى إشاعات بتقول كده ومازالت الإشاعات موجودة) حاجة تفلق الحجر نصفين وبالذات الجزء بتاع الرجالة اللى كانت عايزة تحضن أو تبوس تامر بك حسنى (انا ماعنديش حاجة ضد تامر حسنى ؛باستثناء قصة المحاكمة والجيش طبعاً؛ بس مش ممكن اللى بيحصل ده)، الظاهر ان فعلاً بقى إن فى نقص فى الرجولة فى البلد . المهم فى اخر التدوينة لقيت حتة مكتوبة عن احد المدونين اللى كتبوا تقرير عن الجيش المصرى(وحيث إن الجيش له مكانة عزيزة فى قلبى قلت اشوف ايه الحكاية بدل متطلع مصيبة تانية تغم النفس) ؛ انقر هنا لتصل لموقع المدون شارم ؛ وبصراحة أول مرة أفرح من زمن طويل ؛حاجة تِشرح القلب ...ياه كلنا ده عندنا ،كل ده إحنا ...؛ رجالة تِفرح؛ صحيح وحوش فعلاً انا النهاردة سعيد جداً جداً جداً وربنا يجزى الاخوة المدونين كل خير وربنا يوفق اسود مصر البواسل
February 15 The wounded tiger of Egyptالنمر الجريح
النهاردة قريت الخبر بتاع القبض على عدد كبير من الاخوان على موقع العربية (وصلة لموقع الخبر على موقع قناة العربية ) . من الواضح الآن ان الإدارة الحالية اصبحت كالنمر الجريح الذى هو فى قمة الآمه وغضبه وخوفه أيضاً. متألم من كثرة الإصابات التى به (لاأزعم ان الاخوان هم سبب الاصابات فى جسد الإدارة الحالية ولكن هذه الإصابات هى حصاد مازرعته و تزرعه هذه الإدارة طوال فترة وجودها). وغاضب لأنه حالياً محاصر من كل الجهات تقريباً. من الداخل :الفساد الممتد حتى الجذور والفقر و السخط الشعبى (النتيجة طبيعية للإستهتار بالناس ) ومن الخارج لأن كل حليف يريد مصلحته الخاصة فقط لاغير ؛ أعلى مكسب بأقل مجهود أو مشاكل وهذا الحليف حالياً مشغول بمشروعه الإمبراطورى كحاكم وحيد للأرض(من الأخر كدة أنا أقصد أمريكا اللى هتبيع الإدارة الحالية بدون أن تهتز لها شعرة ويبقى مصيرها مصير الشاه على أحسن تقدير). وأما عن خوفه فلأنه تقريباً محاصر برضه و لديه إيمانه العميق بأن النهاية قريبة جداً جداً جداً. فهو الآن اصبح كالنمر الذى اصيب وصيادوه قاربوا على الإمساك به وبعد أن كان صياداً ماهراً، اصبح مجرد فريسة ذليلة يكاد أن يُمسك به.....،ها هو يسمع صياحهم .... ، وجريهم .....، و نباح كلابهم .....، لقد قارب أن يُمسك به .....، لقد حوصر.....، لقد قاربت حياته على الإنتهاء.....!!!!!إذاً فقد آن أوان الضربة الاخيرة فليضرب بكل قوة (إنها حياته التى قاربت على الإنتهاء) الضربة التى ستعصف بكل ماهو موجود حوله كمحاولة يائسة للنجاة من المصير المحتوم.العجيب فى الأمر أن هذه نفسها الضربة هى التى ستوصله إلى المصير نفسه.
عفواً انا سرحت فى النُص والكتابة الادبية نقحت علىّ February 13 update to the egyptian mass murder in the boatتحديث فى جريمة العبارة أخيراً عرفت اعرض جزء من برنامج الحقيقة ،الحلقة بتاعة العبارة full screenأنقر هنا لتشاهد نداء المواطن الغلبان لسيادة الرئيس محمد حسنى مبارك( الكلام ده اذا ال windows media player ماأظهرش الجزء من الحلقة، الملف 5 mega ممكن تنزله عندك كمان لو عايز: right click وبعدها save )ولحد الآن لسه الريس ماردش حتى على نداء الراجل (لا الريس ولا اى حد من رجال الريس او اى حد من ...............الريس) ايه هو السبب ....؟؟؟؟!!! مش عارف ليه مع إن الريس إستجاب للإضرابات بتاعة العمال زى ماقريت فى جورنال الاهرام يمكن يكون عيان، تعبان ....الله اعلم؛ عموماً سلامتك الف سلامة يا ريس إن شالله العدوين ياريس و إن شالله إحنا حتى كمان يارب عرينا وإكسيهم ،يارب إفقرنا و إغنيهم، يارب إمرضنا ( الفشل الكلوى من التلوث والسرطان وانفلونزا الطيور) و إشفيهم،يارب يعذبونا و نبريهم ، يارب ي....... (بقية الكلام ماجاليش قلب اكتبه علشان انا خواف) مع الإعتذار للمسرحية
February 10 Alaksa is being destroyedالحمد لله بقيت...... مش بنى آدم
النهاردة بعد الصلاة بدل مايجيبوا مع هيكل لقيت الجزيرة جايبةاحداث المسجد الاقصى نقل مباشر؛الحاجة الغريبة إن انا مزعلتش ...!!!!!لقيت ضرب و رصاص نزال على الناس زى المطر و مزعلتش. لقيت فى شاب على عكازين واقف يتحدى الجنود الاقوياء الشجعان(المختبئين خلف الدروع) و ما تأثرتش ....؟؟؟؟. لقيت الجنود الإسرائيليين الانجاس يدنسون المسجد الاقصى ومازعلتش. لقيت إن كل الملسمين والعرب واقفين مابيعملوش حاجة وكأنهم بيشجعوا الضربة الحلوة ..!!!ومازعلتش.افتكرت الفيلم اللى صوره الايطاليين(خد بالك الإيطاليين مش العرب أو بتوع الريادة فى الاعلام العربى) عن غزو العراق و كشفوا إستعمال أمريكا لاسلحة كيمياوية ( الناس كانوا محرقين لكن هدومهم سليمة ....!!!! ده غير إن كان فيه حاجات متصورة مباشر والفيلم عرض على قناة الزوراء)كل ده حصل فى اليومين دول ومازعلتش. فجأة أكتشفت أنى مبقيتش إنسان ولا حتى ينفع أشترى اللقب من بره (زى بقية الاخوة اللى فى مصر و بيشتروا الالقاب بالكوم).وعرفت أنى بقيت زى الجماد أو اقل وكذلك بقية من يطلقون على نفسهم عرب أو مسلمين أو اوربا او امريكا كل دول و إحنا بقينا أقل من الحيوان لنظراً لإنعدام التفاعل الإيجابى تجاه مايحدث لأخواننا فى فلسطين من قِبَل الإسرائيليين بزعامة الرجل الطيب أيهود أولمرت( مش أنا اللى بقول عليه طيب ده الراس الكبيرة اللى قال كدة بعد اخر لقاء بينه) وبالتأكيد المصيبة هتلف تلف وترجع لينا جزاء لنا على إهمالنا فى حق انفسنا و اهلينا.
وبالمناسبة ياحلاوة الاستنكار ياحلاولو ياحلاوة..... و ده طلع كمان إن فى إستدعاء السفير علشان نقوله "كخ"، إخص عليك،عيب كده ...!!!!!ايه الحلاوة دى، معقولة الطعامة دى (اصل الطعامة ده يبقى فى مصر "مع الاعتذار للاعلان") انا مش قادر اصدق .ده اعلى مافى خيلك يا مصر هو ده اللى مصر قدرت تعمله طب اقول ايه مش فاضل غير إن احنا نسيبهم يدبّحوا فينا، وبصراحة إحنا نستاهل اكتر من كدة مليون مرة علشان سبنا شوية حثالة زى دول(أقصد الإسرائيليين طبعاً) يعملوا اللى هم عايزينه فينا
التدوينة دى مكتوبةبدماء الاخوة الضحايا واللون ده بتاع حاجة إسمها دم بتجرى فى عروق البنى آدمين وطبعا إحنا عمرنا ماشفناه بس مش مشكلة نتخيل برضه.
February 06 Calling Mr President Hosny Moubarakنداء إلى السيد الرئيس..... من ضحايا العبارة
لاجل حظى....أتفرجت تانى على حلقة برنامج الحقيقة بتاع وائل الابراشى (يذاع على دريم 2 السبت 8 مساء ويعاد الاحد 4 عصراً) ولقيت حلقة جديدة عن ضحايا العبارة وماذا حدث بعد سنة من هذه الكارثة القومية والذى حدث فى القضية...... لا شىء. الحلقة كانت قاسية جداً و الاقسى ما تعرض له غرقى العبارة و اهاليهم من ظلم وعدوان ومحاولة كتمان الحقيقة ودول شوية صور لعدد من اقارب الضحايا والراجل اللى لابس نظارة فقد عائلته كلها و من ساعتها الراجل....أقول ايه بس ربنا يقويه و الراجل اللى لابس طاقية وماسك صور ده عم محمد مرشدى والطفل ده محمد اما الحلقة نفسها كان فيها الاستاذ وائل الابراشى و محامى من هيئة الدفاع عن ممدوح اسماعيل و المحامى عن بعض الضحايا
و عم محمد مرشدى اللى راح له 7 افراد كانوا عيلته كلها و الطفل محمد اللى مين ياخد باله من بعد ما اهله راحوا المهم إن الحلقة طبعاً زى ماهو متوقع أظهرت الخراب اللى فى البلد و الاخ المحامى بتاع ممدوح اسماعيل حاول يطلعه زى الحمل الوديع و المحامى بتاع الضحايا حاول انه يُظهر الظلم اللى بيحصل للناس من بعد ما اقاربهم توفوا(كمان ماهو اصلهم ناقصين ظلم ) بس اللى فعلا مهم اكتبه هو النداء اللى وجهُ عم محمد مرشدى لسيادة الرئيس محمد حسن مبارك قائلاً:" يا ريس ده إحنا ولادك برضه هو ممدوح اسماعيل طفشان بره إزاى ومين اللى خرجه فى معلومات وفى كل حاجة و ماحدش بيسأل فينا .....!!!!! والراجل طلع بعدها صور افراد عيلته اللى ماتوا
والراجل كان بيبكى بعزم مافيه ولو كان يقدر كان بكى بدل الدموع دم(وانا كمان الصراحة)
والحلقة كانت كلها غم فى غم والسؤال هو الراجل الهربان اللى اسمه ممدوح اسماعيل ده ماحدش قادر عليه ولا ايه ،هو مين يعنى اللى حاميه قوى كدة. وبعدين الراجل الغلبان ده إستغاث بالريس على الفضائيات ياترى الريس هيستجيب له والناس تاخد حقوقها من ممدوح اسماعيل ولا لاء. أنا فاكر ايام إنتخابات الرياسة أن الجورنال (تقريباً جورنال الاهرام) نشر صورة الريس وهو قاعد مع راجل غلبان فى عشة الراجل ؛ده ايام جولات الريس الانتخابية . طب دلوقتى الإنتخابات خلصت...!!! و كارثة العبارة عدى عليها سنة وماحدش عمل حاجة للناس دى وأنا مش قصدى التعويضات انا أقصد المحاكمة الجنائية للقتلة (سواء اللى غَرَقوا العبارةأو الناس اللى بعد ماغرقت العبارة تركوا الضحايا للموت حرقاً أو غرقاً أو أكلاً). يعنى السؤال بوضوح اكتر هو ممدوح إسماعيل ده واللى بيساعدوه أقوى من أكبر راس فى مصر (أقوى واحد فى مصر أو نمرة واحد زى مابيقولوا فى الجيش) ولا ايه.....هه ؟؟؟!!!!هذا هو ماستكشف عنه الايام القادمة إذا عشنا وكان لينا عمر
الصور فى ال photo album فى الصفحة الرئيسية
February 03 One year after the egyptian boat mass murder in the Red seaكنت بسيرف الانترنت(حلوة بسيرف دى.... عربيزى تمام) ولقيت day light كاتبة مدونة عن العبارة فى الذكرى السنوية لجريمة القتل الجماعى تلك فالصراحة كان لقيت تساؤلات كتيرة فى ذهنى مش عارف الاقى إجابتها فكتبتها يمكن فى يوم أعرف الإجابات......يمكن. الناس اللى غرقوا فى العبارة دول عاشوا فيلم تايتانيك بس على أسوء ده غير أن كمان اللى مغرقش منهم كان عليه أنه يواجه اسماك القرش وفعلاً ناس كتير واطفال كتير كان السمك واكلهم (زى ما الغطاسين قالوا فى برنامج الحقيقة اللى إتذاع أيامها). بس اللى محيرنى فعلاً ولحد دلوقتى ماحدش جاب سيرته هو:إزاى عبارة تتأخر عن ميعادها المدة الطويلة دى قبل ماحد يعمل حاجة(هم كانو عايزين يمَوتوا الناس ولا ايه). المفرض أن مصر دولة مستهدفة (زى ما الإعلام ليل نهار بيقول) وأدينا شفنا تفجيرات كتير وحتى فى شرم الشيخ كمان.طب ماحدش كان بيفهم كدة وخاف احسن العبارة اللى أتاخرت عن ميعادها المدة الطريلة دى يكون إرهابيين خطفوها وهينفذوا بيها عملية إنتحارية زى بتوع 11 سبتمبر . طب مش المفروض تكون السواحل بتاعتنا متراقبة كويس بدل ما حد من اعداء مصر يستغل اى فرصة وينفذ اى عملية إنتحارية تدمر السياحة والاقتصاد والغردقة كدة تحصل شرم الشيخ...!!!!. وبعدين النداءات الكتيرة اللى فضلت كام ساعة دى مش المفروض أن الحاجات دى متراقبة كويس لحماية مصر من أى خطر..!! ده النداءات دى راحت لإنجترا وفرنسا والجزائر ...!!! كل دة والقائمين على حماية حدود وسماء وبحر واتصالات مصر مش عارفين....!!!! معقولة برضه؛ ده كلام؛ امال ايه حكاية مصر مستهدفة بحكم ثقلها ولا وضعها اللى كل شوية بنسمعها دى...؟؟ ما هو ياإما مصر مستهدفة فعلاً وفى الحالة دى كل القائمين على حماية مصر لازم يكونوا منتبهين كويس جداً لأى شىء ويبقى إزاى كل البلاوى حصلت من غير ما يعرفوا حاجة...؟؟ أو ياإما الناس المسؤلة دى مكبرة دماغها ومصر لاهى مستهدفة لا بتاع والكلام ده كله كلام فارغ ويكونوا علشان كدة مأخدوش بالهم من حكاية العبارة وبعد كدة عرفوها من التليفزيون. طب لما هما عرفوها من التليفزيون زى بقية الناس ليه ما طلعوش قوارب سريعة لإنقاذهم بدل المركب الضخمة اللى فضلوا يجهزوا فيها 6 ساعات طب ليه ما طلعوش طائرات هليكوبتر تنقذ الناس او حتى ترمى لهم قوارب نجاة(أو إن حتى عومات أو حتى فِرد كاوتش داخى بتاع العربيات.... بس منفوخ) طب بلاش دى؛ ليه ماسمحوش للأفراد بالمشاركة فى جهود الانقاذ( فى برنامج الحقبقة جه واحد وقال ان عنده قارب سريع و كان فى الامكان إنقاذ ناس كتير بالقارب ده بس المسؤلين منعوا خروج القارب) تساؤلات كتيرة مش عارف الاقى لها إجابة ..؟؟؟
ماحدش عنده إجابة عدلة توحد الله..؟؟؟ February 02 Maadi Slayer ...the reason why they did not arrest him till nowلماذا لم يتم القبض على سفاح العادى حتى الآن...؟؟؟؟
طلعت علياّ نوبة تفكير وقلت ابقى بنى آدم مفكر (يعنى هى جت علياّ ما البلد مليانة ناس بتقول اى كلام فارغ)، وقعدت افكر ايه الحكاية : هم ليه مش عارفين يقبضوا على سفاح المعادى؛ كل الناس دى وكل القدرات المادية(المادية كلنا متفقين عليها) والتكنولوجية( على سبيل المثال لا الحصر: حبايبنا الحلوين فى وزارة الداخلية "اللهم اجعل كلامنا خفيف عليهم"؛ عندهم من القدرات ان الموبايل حتى لو مغلق ممكن يسمعوا الكلام الذى يدور حوله طالما البطارية فيه وده مش عن طريق شركة المحمول، وفى كلام ان تليفون البيت من الممكن ان يتحول إلى اداة تنصت على ما يدور فى البيت و ده غير التنصت على المكالمات بس الحتة الاخيرة دى انا مش متأكد منها). طب ده لجنة الامن القومى اتكلمت فى الموضوع يعنى الموضوع اصبح يمس الامن القومى...!!! وبرضه مش عارفين يقبضوا على السفاح...!!!. طب ماهو ممكن السيكو سيكو ؛اللى بيشوش من فوق لما الملهم المختار بيعدى فى الشارع ؛يجيب صور السفاح...!! طب لو السيكو سيكو مش بتاعنا برضة ممكن انه يجيب صور السفاح(مإحنا حلفاء برضه واحنا لسة مأيّدينهم من قريب). ملحوظة هامة أن GOOGLE EARTH فى إصدارأسمه ENTERPRISE CLIENT وأختصاره GOOGLE EARTH EC البرنمج ده من الممكن عن طريقه متابعة الاشخاص LIVE ...!!!! يعنى كدة كدة من الممكن ان السفح ده يتجاب وبعدين اساساً اساساً المفروض ان الأمن ايده طايلة ولا هى بتطول بس أعداء الادارة الحاكمة ولا ايه...؟؟؟ دة حتى كان فى حد من المسؤلين بيقول ان فى كام الف شخص بيعملوا معرفش ايه علشان يجيبوا السفاح وبرضه معرفوش يقبضوا عليه...!!! ماعلينا المهم نزل علىّ الإلهام (يلا إشمعنى انا) لما جبت جورنال المصرى اليوم وعرفت ايه سر الحكاية
من الواضح انه تم شغل الناس الكبيرة بالقضية دى ويلا بقى بلا سفح بلا ناس غلابة بلا وجع دماغ؛ المهم ان كل شىء يتظبط كويس والمستخبى مايبانش..!! أما عن الناس الصغيّرة فمشغولين بده .......!!!!!!! امممممم علشان كدة بقى.لاء ده الحكاية بقت واضحة قوى قوى قوى....!!!. أنا مش عارف أكتب ايه ؛بس ربنا لما ابتلانا بنكسة 1967 كان علشان ربنا كان عايز يحمينا من أن إحنا نوصل لهذا القدر من الانحطاط: غرق عبارات وترك من عليها ليموتوا محروقين أو غرقى أو مأكولين ؛ تصادم قطارات واعداد ضخمة للوفيات؛ حريق مسرح بنى سويفوترك من فيه ليحترقوا حتى الموت ؛ أكياس الدم الفاسدة؛ الماء والهواء ملوثين ولا يصلحوا للحياة الآدمية؛ المصرى يهان داخل وخارج بلده بمنتهى السهولة"حاجة ببلاش كدة"؛ده طبعاً غير البلاوى اللى مكتوبة أعلاه؛ اكتب ايه ولا ايه ولا ايه...!!!
يارب إرحمنا من أنفسنا ومن إهمالنا؛ لأنفسنا و وطننا و أبناء وطننا . هذا الأهمال الذى جعلنا نصل لهذا الوضع القمىء
و لكن توجد ملحوظة انه مازال يوجد أناس شرفاء فى الشرطة و مجاس الشعب ولجنة الامن القومى وكل مكان فى البلد ولكن من الواضح أن هولاء الناس فى حالة إنقراض مستمرة متسارعة ربنا يحفظهم ويحفظنا Sonna and Shiates inEgyptأدى اخرتها
لقيت الخبر ده على موقع العربية تهييج"غير مسبوق" بين السنة والشيعة في معرض القاهرة للكتاب (وصلة لموقع الخبر )....!!!!!! أدى نتيجة الكلام الفارغ بتاع الإعلام الحكومى اللى راسه والف سيف ان يلقنّا ان الشيعة دول ليسوا على الاسلام الصحيح . وعلى سبيل المثال لا الحصر محاولة الاخ تامر فى بيتهم (برنامج البيت بيتك سابقاً) أن يظهر خطأً ان الشيعة ليسوا مسلمين ولكن المفتى رد عليه بوضوح شديد ان هذا الكلام لا أساس له من الصحة وأن الشيعة الموجودين الآن لا يوجد فى معتقداتهم أى شىء مخالف للشريعة السمحاء(عفواً لأن مفردات الكلام لا تسعفنى فى توضيح مقصدى) . المهم أن الإعلام الحكومى تكرم وتعطف وزرع بذور الخلاف والشقاق بين الاقباط المسلمين .
يعنى هى المشرحة ناقصة قُتلى أنا مش فاهم ايه الغباء ده يعنى احنا ناقصين تفريق فى مصر مش كفاية محاولات التفريق بين الاقباط المسلمين و الاقباط المسيحيين لاء كمان الإعلام بيكملها علشان الاقباط المسلمين يتقسموا :شوية اقباط مسلمين سنة وشوية القباط مسلمين شيعة..!!!! هو الإعلام ده بتاع مصر ولا الإعلام ده بتاع اعداء مصر
يارب إرحمنا من المسؤلين فى مصر شوية حد من لجنة الامن القومى وشوية حد من الإعلام،اللهم نشكو إليك ضعف قوتنا وقلة حيلتنا انت رب المستضعفين وانت المنتقم الجبار يارب
(المقطع الاخير مستوحى من إحدى مقالات الاستذ إبراهيم عيسى فى صحيفة الدستور)
January 26 Palastine.... is it the beginning of the end?ماذا يحدث فى فلسطين
خير اللهم الله اجعله خير كنت بتغدى مع أهلى ؛وعلى الاكل لقيت الخبر الغم ده؛ اللى يسد النفس: "الأقصى" تختطف 11 من القوة التنفيذية بنابلس وتهدد بقتلهم ( وصلة لموقع الخبر على موقع قناة العربية)
مش ممكن يعنى....!!! الحكاية بقت غم جداً؛ كل المتبقى ان أولمرت او بيرتس يتقدم بجواب شكر للاخوة الفلسطينيين على قتلهم بعضهم البعض (بدل منتعب العساكر الاسرائليين) وكمان على تشويههم صورة العرب والمسلمين (بدل منتعب الاعلام الاسرائيلى، وكمان علشان القصة تبقى طبيعية ومحدش من الاخوة بتوع نظرية المؤامرة يفتح بقه) ويبقى زيتنا فى دقيقنا على رأينا إحنا المصريين.وصورة العرب الآن انهم همج ومتخلفون وان إسرائيل هى واحة الديموقراطية فى الشرق الاوسط وأن هذه هى نتيجة الديموقراطية مع العرب وبالذات المسلمين وهذه هى نتيجة وصول حماس للحكم( وهيطلع كلام فارغ من عينة: أن هذه نتيجة وصول الاسلاميين للحكم) المفروض ان الاخوة فى فلسطين يكونوا عارفين كويس ان إسرائيل تركت جزء من الارض الفلسطينية للفلسطينيين علشان الفلسطينيين يتجمعوا فيه وياكلوا فى بعض؛ ده غير انه عند اى مشكلة هيكون من السهل ان إسرائيل تلم المطلوبين بسهولة شديدة!!!.
|
|
|
